Սեպտեմբերի 21-ոչ շարժական Աստվածամոր ծննդյան տոնն է ու Սուրբ պատարագ էր մատուցվել Գեթսեմանի Սուրբ Աստվածածնի տաճարում: Պատարագից հետո տեղի էր ունեցել հանրապետական մաղթանք հանդիսապետությամբ Երուսաղեմի Հայոց պատրիարքարանի Լուսարարապետ Սևան արքեպիսկոպոս Ղարիբյանի: Այսքանով սակայն տոնական միջոցառումները չեին ավարտվել: Երեկոյան էլ մեր միաբաններ ու սաղեմահայերը հավաքվել էին Սրբոց Հակոբյանց վանքում՝ Գյուլբենկյան գրադարանի մուտքի մոտ, նշելու Հայաստանի անկախության 28-րդ տարեդարձը: Շենքը լուսավորված էր մեր դրոշի երեք գույներով ու հուզիչ այդ մթնոլորտում ելույթներ ունեցան Երուսաղեմի հայկական գաղութի երեխաները:
Միջոցառմանը ներկա էր անձամբ Հայոց պատրիարք Նուրհան արքեպիսկոպոս Մանուկյանը: Պատրիարք հայրը ներկաներին օրհնելուց զատ ներկայացրեց նաև վերջերս Երուսաղեմում ստեղծված «Արմատներ» երիտասարդական հանձնախմբի անդամներին, ովքեր որ կազմակերպել էին իրենց այդ անդրանիկ միջոցառումը նվիրված Հայաստանի անկախության տոնին:
Օր առաջ գեղեցիկ տոնական միջոցառում կազմակերպվել էր նաև Երուսաղեմի «Թարգմանչաց» վարժարանում, որին մասնակցել էին ուսուցչական կազմը՝ տնօրենի գլխավորությամբ: Ներկայացվել էր Հայաստանի անկախացման պատմությունն ու ընդհանրապես անկախության արժեքը հայ ժողովրդի համար: Հայ դպրոցականների համար կրթօջախի տնօրինությունն իսկական տոն էր կազմակերպել՝ ձեռագործ եռագույն դրոշների ու հայկական խորհրդանիշերի պատրաստման խմբակների ու տարբեր սպորտային մրցույթների տեսքով: Շատ ակտիվ իր մասնակցությունն էր անկախության տոնին բերել նաև «Թարգմանչաց» նախակրթարանի բոլոր 5 խմբերի սաները: Հատկապես տպավորիչ էին «Ծաղիկ» դասարանի երեխաներն՝ իրենց հայկական տարազներով: Նրանք մասնակցեցին այս գեղեցիկ տոնին ու հետ չմնալով իրենց ավագ եղբայրներից ու քույրերից իրենց ջանասիրությամբ զարմացրեցին ներկաներին: Ընդհանրապես «Թարգմանչաց» վարժարանի տեսուչ Նարեկ սարկավագ Աբրահամյանը շատ մեծ ուշադրություն է դարձնում նախակրթարանների ուսումնական գործընթացի կազմակերպման վրա, քանզի համոզված է, որ հայրենասիրությունն ու կրոնի և եկեղեցու նկատմամբ սերն ու հավատն անհրաժեշտ է սերմանել փոքր հասակից:
