2026 թվականի հուլիսի 24-ին՝ ուրբաթ օրը, Գ Հայագիտական միջազգային համագումարի շրջանակում տեղի ունեցավ արդեն ավանդույթ դարձած կլոր սեղան-քննարկումը՝ Երևանի Մաշտոցի անվան Մատենադարանի ղեկավարության և հայկական հոգևոր-ձեռագրական կենտրոնների ներկայացուցիչների մասնակցությամբ։
Քննարկմանը մասնակցում էին Մայր Աթոռ Սուրբ Էջմիածնի, Մեծի Տանն Կիլիկիո կաթողիկոսության, Երուսաղեմի Հայոց պատրիարքության, Պոլսի Հայոց պատրիարքության, Մխիթարյան միաբանության և Զմմառի պատրիարքական կղերի միաբանության հոգևոր-ձեռագրական կենտրոնների ներկայացուցիչները։
Հրավիրյալների թվում էին նաև «Գալուստ Կյուլբենկյան» հիմնադրամի հայկական համայնքների բաժնի ղեկավար Ռազմիկ Փանոսյանը և Հայաստանի ԳԱԱ Հիմնարար գիտական գրադարանի տնօրենի խորհրդական Տիգրան Զարգարյանը։
Քննարկման ընթացքում անդրադարձ կատարվեց հարցերի լայն շրջանակի, որոնք վերաբերում էին ձեռագրական հավաքածուների պահպանության համակարգերի արդիականացմանը, թվայնացմանը և գիտական ուսումնասիրությանը։ Բոլոր կողմերը վերահաստատեցին իրենց պատրաստակամությունը շարունակելու արդեն իրականացվող համատեղ ծրագրերը և մշակելու առաջիկա համագործակցության նոր գործողությունների ծրագիր։
Առանձնակի ուշադրություն դարձվեց Վենետիկի Մխիթարյան միաբանությունում իրականացված առաքելության արդյունքներին, Զմմառի կղերի միաբանության նորաստեղծ ենթակառուցվածքներին ցուցաբերված փորձագիտական աջակցությանը, ինչպես նաև Մեծի Տանն Կիլիկիո կաթողիկոսությունից բերված X դարի Ավետարանի վերականգնման աշխատանքներին։
Քննարկման ավարտին մասնակիցներն ընդգծեցին Հայագիտական միջազգային համագումարի բացառիկ նշանակությունը՝ այն գնահատելով որպես առկա խնդիրների համատեղ վերլուծության, փորձի փոխանակման և համագործակցության զարգացման կարևոր հաստատութենական հարթակ։
Երուսաղեմի Հայոց պատրիարքությունը ներկայացնում էր Պատրիարքության Սուրբ Թեոդորոս ձեռագրատան և Հելեն և Էդուարդ Մարտիկյան թանգարանի տեսուչ, հոգեշնորհ Տ. Արշակ աբեղա Ղազարյանը։
