Հոկտեմբերի 28-ին Բատ Յամ քաղաքի «Աուդիտորիում» դահլիճը լցվել էր ֆրանսիական շանսոնի տաք հնչյուններով և հին փարիզյան տրամադրությամբ։ «Ֆրանսիական շանսոնի լեգենդները» խորագրով համերգը միավորել էր ֆրանսիական երաժշտության սիրահարներին՝ ստեղծելով իսկապես հիշարժան երեկո։
Երեկոյի գլխավոր աստղը Դանիելլա Միխեևան էր և դաշնակահար Իգոր Օստրովսկին, սակայն հանդիսատեսի համար առանձնահատուկ պահ դարձավ Իսրայելում հայտնի հայ երգիչ, վոկալի հմուտ ուսուցիչ Տիգրան Գասպարյանի բեմ բարձրանալը։ Տիգրանը իր տպավորիչ կատարումներով գրավեց դահլիճը՝ ներկայացնելով Շառլ Ազնավուրի դասական ստեղծագործությունները մի նոր շնչով, անկեղծ զգացմունքով և հայկական հոգու ջերմությամբ։
Բեմից նա հպարտությամբ հայտարարեց․
«Ես ազգությամբ հայ եմ, ինչպես Շառլ Ազնավուրը և ինձ համար մեծ պատիվ է երգել այս երգերը, որոնց հեղինակը նույնպես մեր մեծ հայն է՝ Շառլ Ազնավուրը»։
Դահլիճում ներկա էին նաև հայեր երկրի տարբեր քաղաքներից, որոնք ծափահարություններով և հուզմունքով ընդունեցին Տիգրանի խոսքերը։ Նրա կատարումները, մասնավորապես Ազնավուրի ամենահայտնի երգերից մի քանիսը, վերածվեցին իսկական զգացմունքների պոռթկման․ երգչի ձայնի խորությունն ու բեմական ներկայությունը առանձնանում էին իր անկեղծությամբ և բարձր արհեստավարժությամբ։
Համերգին մասնակցեց նաև երգչուհի Օլգա Մեդվինսկին՝ լրացնելով երեկոյի երաժշտական պալիտրան Միրեյ Մատյոի և Էդիտ Պիաֆի հայտնի ստեղծագործություններով։
Բատ Յամի այս երաժշտական երեկոն դարձավ ոչ միայն ֆրանսիական շանսոնի տոն, այլև հայկական մշակութային ներկայության հպարտ դրսևորում Իսրայելում՝ շնորհիվ Տիգրան Գասպարյանի տաղանդի, նվիրվածության և ազգային ինքնության հանդեպ սիրո։
Երբ համերգից հետո բեմ բարձրացանք մի խումբ հայերով ու շնորհակալություն հայտնեցինք Տիգրանին, շատ հրեա արվեստասերներ խմբերով մոտենում էին մեզ ու հարցնում, թե որտե՞ղ և ե՞րբ կրկին կարող են լսել Տիգրանի կենդանի կատարումները:
