Պետախ Տիկվայի հայկական դպրոցի երկու դասարանների սաներն ու նրանց ծնողներն այսօր այցելեցին Երուսաղեմ ու հյուրընկալվեցին հայկական համայնքի կողմից: Չնայած որ Երուսաղեմի հայկական թանգարանի բացումը նախատեսված է նոյեմբերի 14-ին, այնուամենայնիվ Երուսաղեմի ժառանգավորաց վարժարանի ու ընծայարանի տեսուչ, ծայրագույն վարդապետ Թեոդորոս Զաքարյանի կարգադրությամբ հայ աշակերտներն ու նրանց ծնողները բացառիկ հնարավորություն ունեցան ծանոթանալու Երուսաղեմի հայկական համայնքի հիմնադրման պատմությանը: ՈՒշագրավն այն է, որ ավելի քան 10 տարի տևած վերանորոգման ու գեր ժամանակակից տեխնիկական միջոցներով հագեցած մեր թանգարանն իրոք զարմացրեց իր կահավորման, տեսասրահի ու թանգարանային նմուշների եզակի հավաքածուով: Թանգարանի տնօրեն, տիկին Ցողիկ Կարագաշյանը կրկին պաշտոնական բացումից հետո մեր դպրոցի սաներին հրավիրեց թանգարան, որտեղ արդեն արեստավարժ էքսկուրսավարի միջոցով ավելի մանրամասն հնարավոր կլինի ծանոթանալ ցուցանմուշների հետ:
Երուսաղեմի Հրեշտակապետաց վանքի տեսուչ, միաբան հայր Ղևոնդ վարդապետ Հովհաննիսյանը հյուրընկալելով հայկական դպրոցի հյուրերին սիրով ներկայացրեց թանգարանի հիմնադրման պատմությունն ու ըստ ցուցասրահների առանձին-առանձին հայ աշակերտներին ու ծնողներին ներկայացրեց տեղադրված նմուշների առանձնահատկություններն ու Հայ Երուսաղեմի հարուստ պատմությունը:
Թանգարանի երկրորդ հարկում ներկայացված էին փաստեր Հայոց Ցեղասպանության վերաբերյալ: Կային հատկապես Երուսաղեմի հայկական թաղամասում ապաստանած Ցեղասպանությունից մազապուրծ եղած հայերի, որբացած մանուկների մասին պատմող փաստաթղթեր ու լուսանկարներ:
Թանգարանի նմուշների հետ ծանոթանալուց հետո հայ երեխաներին հայր Ղևոնդը հյուրընկալեց Երուսաղեմի Հրեշտակապետաց վանքում, որտեղ ոչ միայն ներկայացվեց վանքի հիմնադրման պատմությունն, այլև ներկայացվեց հայկական քրիստոնեական ծիսակարգերն ու հայկական հին ավանդույթները:
Պայմանավորվածություն ձեռք բերվեց Պետախ Տիկվայի հայկական համայնքի ներկայացուցիչների՝ հայ հոգևորականների հետ հանդիպում կազմակերպելու հետ կապված:
Ժառանգավորած վարժարանի բակում հանգստանալուց հետո Պետախ Տիկվայի հայկական դպրոցի սաները մասնակցեցին Սրբոց Հակոբյանց մայրավանքում մատուցած պատարագին:
