Շաբաթ, 24 հունվար, 2026 թ.-ի, առավոտյան ժամը 10։30-ին, Լուսարարապետ Գերաշնորհ Տ. Սևան Արքեպիսկոպոս Ղարիբյանի գլխավորությամբ, միաբան հայրերի ընկերակցությամբ, Հայոց Պատրիարքության պաշտոնական պատվիրակությունը այցելեց աշխարհի հնագույն քաղաքներից մեկը՝ Երիքով։
Այցի շրջանակում պատվիրակությունը հանդիպում ունեցավ Երիքովի կառավարիչ Մեծարգո պարոն Հուսեյն Համայելի հետ։ Լուսարարապետ Սրբազանը և հոգևոր հայրերը ջերմորեն դիմավորվեցին Երիքովի կառավարության աշխատակազմի կողմից և հրավիրվեցին պաշտոնական հանդիպման։ Ողջույնի խոսքում քաղաքապետը բարձր գնահատեց Հայոց Պատրիարքության այցը՝ ընդգծելով դրա նշանակությունը միջեկեղեցական և համայնքային հարաբերությունների ամրապնդման գործում, ինչպես նաև շնորհավորեց Հայոց Սուրբ Ծննդյան տոնը։
Լուսանկարի հեղինակ՝ Շմուլիկ Քոհեն
Ի պատասխան՝ Լուսարարապետ Գերաշնորհ Տ. Սևան Արքեպիսկոպոս Ղարիբյանն իր երախտագիտությունը հայտնեց ջերմ ընդունելության և ցուցաբերված հյուրընկալության համար՝ ընդգծելով նման հանդիպումների կարևորությունը տարածաշրջանում քրիստոնեական ներկայության պահպանման և խաղաղ համակեցության խթանման գործում։ Հանդիպման ավարտին կողմերը միմյանց հրաժեշտ տվեցին՝ վերահաստատելով համագործակցության շարունակականության պատրաստակամությունը։
Հանդիպումից հետո Լուսարարապետ Սրբազան Հոր գլխավորած պատվիրակությանը միացան նաև Ժառանգավոր սաներն ու ուխտավորները, որոնք միասին ուղևորվեցին դեպի Հորդանան գետ, որտեղ տեղի ունեցավ ամենամյա Ջրօրհնեքի հանդիսավոր արարողությունը։ Արարողությունը հանդիսանում է Հայ Առաքելական Եկեղեցու կարևորագույն քրիստոնեական ծեսերից մեկը և առանձնահատուկ նշանակություն ունի ինչպես տեղական հայ համայնքի, այնպես էլ ուխտավորների համար։
Հորդանանյան կողմից գետի ափ էին ժամանել Հորդանանահայոց առաջնորդ և Պատրիարքական փոխանորդ Հոգեշնորհ Տ. Ավետիս Ծ. Վարդապետ Իփրաճյանը՝ իր համայնքի հավատացյալների հետ միասին։ Արարողությունը վերածվեց համընդհանուր աղոթքի՝ համեմված հոգևոր վերազարթոնքի պահերով ։
Հայոց Պատրիարքարանի կողմից նման ուխտագնացությունների և քրիստոնեական ծեսերի կազմակերպումը մեծ կարևորություն ունի Սուրբ Երկրում հայ համայնքի հոգևոր կյանքի պահպանման, ազգային ինքնության ամրապնդման և սերունդների միջև հավատքի շարունակականության ապահովման տեսանկյունից։ Պատրիարքարանի հետևողական գործունեությունը նպաստում է նաև Սուրբ վայրերի հանդեպ հայ ժողովրդի դարավոր իրավունքի և ներկայության պահպանմանը։
Լուսանկարները՝ Շմուլիկ Քոհենի
Աղբյուրը՝ Երուսաղէմի Սրբոց Յակոբեանց Միաբանութիեան պաշտոնական կայք
